ინგლისის ჩემპიონატის მე-18 ტურში პრემიერლიგის ოთხი გრანდიდან ორი ერთმანეთს შეეყრება - კვირას "არსენალი" "ლივერპულს" უმასპინძლებს. პრინციპული დაპირისპირების წინ "მეთოფეთა" თავდამსხმელი ემანუელ ადებაიორი აცხადებს, რომ მისი გუნდი ამ შეხვედრაში მხოლოდ მოსაგებად იბრძოლებს.
"ლივერპულთან" მატჩს ჩვენთვის უდიდესი მნიშვნელობა აქვს. ბოლოს და ბოლოს უნდა დავუმტკიცოთ საკუთარ თავს, რომ პრემიერლიგაში უმაღლესი მიზნის მიღწევა შეგვიძლია. სადღეისოდ, მერსისაიდელები 8 ქულით გვისწრებენ, მომავალი შეხვედრა კი ჩამორჩენის შემცირების შესანიშნავ შანსს გვაძლევს, რაც აუცილებლად უნდა გამოვიყენოთ. კვირას მხოლოდ მოსაგებად ვიბრძოლებთ, ნებისმიერი სხვა შედეგი ჩვენთვის მიუღებელი იქნება. ასეთი ტიპის შეხვედრისთვის სპეციალურად განწყობა საჭირო არც არის, მოტივაცია თავისით მოდის და შენში მებრძოლის სულს ერთი-ორად ამაღლებს. კვირას "არსენალის" თითოეული ფეხბურთელი ბოლომდე დაიხარჯება და იმედი მაქვს, მოედანს თავაწეულები დავტოვებთ", - ამბობს ადებაიორი.
სადღეისოდ, ინგლისის პრემიერლიგას "ლივერპული" 38 ქულით ლიდერობს, მეხუთე ადგილზე მყოფი "არსენალის" აქტივში კი 30 ქულაა. ხოლო მათ შორის "ჩელსი" (37 ქულა), "მანჩესტერ იუნაიტედი" (32) და "ასტონ ვილა" (31) არიან.