ბრაზილიური წარმოშობის ხორვატიის ფეხბურთელთა ეროვნული ნაკრებისა და ინგლისის "არსენალის" თავდამსხმელი ედუარდუ და სილვა, 10 თვიანი იძულებითი პაუზის შემდეგ, რომელიც ფეხის მოტეხილობით იყო გამოწვეული, მოედანს ლონდონური კლუბის სარეზერვო გუნდში დაუბრუნდა, მაგრამ, პირველი ტაიმის შემდეგ, მუხლმა შეაწუხა და შესვენების შემდეგ შესაცვლელი შეიქმნა.
როგორც 25 წლის ფეხბურთელმა AP-სთან საუბარში განაცხადა, დაზიანება საშიში არ აღმოჩნდა და იმედი გამოთქვა, რომ 2009 წლის დასაწყისიდან, ძირითად გუნდს დაუბრუნდება და ძველებურზე უკეთ ათამაშდება.
"ბოლო 10 თვის განმავლობაში, მოედანზე პირველად გამოვედი და უბედნიერესი ადამიანი ვარ. ვიმედოვნებ, რომ თამაშიდან თამაშამდე მოვუმატებ, რადგანაც მე ბევრად მეტი შემიძლია. შეხვედრის მსვლელობის დროს, მუხლში უსიამოვნო შეგრძნება დამეუფლა, თუმცა საშიში არაფერია. როგორც ექიმებმა მითხრეს, ორ კვირაში ყველაფერი რიგზე იქნება და თამაში შემეძლება. მსურს, რომ რაც შეიძლება სწრაფად, ტრავმამდელ სათამაშო დონეს დავუბრუნდე და იქნებ ძველებურზე უკეთაც ავთამაშდე" - თქვა და სილვამ.
ედუარდუ და სილვა "არსენალში" 2007 წელს ზაგრების "დინამოდან" გადავიდა, მაგრამ მხოლოდ 17 შეხვედრის გამართვა მოასწრო და მათში 4 გოლი გაიტანა. ხორვატიის ეროვნულ ნაკრებში, 25 წლის ბრაზილიელი 2004 წლიდან თამაშობს და 22 მატჩში 13 გოლი გაიტანა.